ထေရ၀ါဒသာသနာ ကမ္ဘာလွှမ်းစေဖို့

ဤကမ္ဘာလောက၌ လူအမျိုးမျိုး ကိုးကွယ်ရာ ဘာသာ အမျိုးမျိုး ရှိကြသည်။အဓိက ကိုးကွယ်သည့် ဘသာသာကြီး လေးရပ်ရှိလေသည်။ ဗုဒ္ဓဘာသာ၊ ခရစ်စယာန်ဘာသာ၊ ဟိန္ဒူဘာသာ နှင့် မူစလင်ဘာသာတို့ ဖြစ်ကြသည်။ထိုလေးမျိုးတွင် ဗုဒ္ဓဘာသာသည် အဓိကအားဖြင့် ထေရ၀ါဒဗုဒ္ဓဘာသာ၊ မဟာယာနဗုဒ္ဓ ဘာသာဟူ၍ နှစ်မျိုးရှိသည်။ ကမ္ဘာသူ ကမ္ဘာသားတို့သည် ဗုဒ္ဓဘာသာဟု ပြောလိုက်ပါက မဟာယာနဗုဒ္ဓဘာသာ အဖြစ်သာ အသိများကြသည်။ထေရ၀ါဒဗုဒ္ဓဘာသာ နိုင်ငံများနှင့် ထေရ၀ါဒဗုဒ္ဓဘာသာ အကြောင်းကို သိသူနည်းပါးလှသည်။ကျွန်ုပ်တို့မြန်မာနိုင်ငံသည် ပရိယတ် ၊ ပဋိပတ် ထွန်းကားသောကြောင့် လည်းကောင်း၊ သံဃာအရေအတွက် အများဆုံး ဖြစ်သောကြောင့်လည်းကောင်း ထေရ၀ါဒနိုင်ငံများထဲတွင် အထင်ရှားဆုံး ဖြစ်သည်။သို့သော် ကမ္ဘာသို့ သာသနာဖြန့်နိုင်မူနူန်းမှာ အနည်းဆုံး ဖြစ်ပေသည်။သာသနာပြုရာ၌ ကမ္ဘာသူကမ္ဘာသားအားလုံး နားလည်နိုင်ဖို့ရန် အခြေခံလိုအပ်ချက်မှာ ကမ္ဘာသုံး အင်္ဂလိပ်စာပေ တတ်ကျွမ်းမူပင် ဖြစ်ပေသည်။ ထိုလိုအပ်ချက်သည် ကျွန်ုပ်တို့နိုင်ငံရှိ သာသနာပြု အရှင်မြတ်တို့အတွက် အဓိကအားနည်းမူ ကြောင့် ဖြစ်ပေသည်။

ပခုက္ကူမြို့ ၊မဟာဝိသုတာရာမ အလယ်တိုက် ဆရာတော် ဦးပဏ္ဍိတာဘိဝံသဆရာတော်ဘုရားကြီးသည် ပိဋကတ်အရာမှာ ပါဠိတော် ၊ အဋ္ဌကထာ၊ ဋီကာ စသည်တို့၌ ထုံးလိုချေ ရေလိုနှောက် ကျမ်းတတ်ပေတတ် ဆရာတော်ကြီးတစ်ပါး ဖြစ်ပါသည်။ သို့သော် ဆရာတော်သည် အင်္ဂလိပ်စာပေကိုတော့ ကိုယ်တိုင်လည်း မတတ်ခဲ့ပေ။ အင်္ဂလိပ်စာ လေ့လာလိုက်စား သင်ယူသော စာသင်သားများကိုလည်း ကျောင်းတိုက်မှာ သီတင်းသုံးခွင့် မပြုခဲ့ပေ။လောကီ လောကုတ် နှစ်ဘက်ရ ကျမ်းပြုဆရာတော် ဦးကေလာသ (ဓမ္မာစရိယ ဘီအေ) ကျောင်းတိုက်၌ ရှိပါသော်လည်း သင်ကြားပို့ချခွင့် မရခဲ့ပေ။ အခွင့်သင့်၍ အခါကြုံလာသည်ဟု ဆိုရမည် ဖြစ်ပေသည်။ ဆရာတော်ဘုရားကြီး သက်တော် (၈၀) ပြည့်ခါနီး အချိန်တွင် သူကိုယ်တိုင် နိုင်ငံခြား သာသနာပြုခရီး ကြွတော်မူခဲ့ရသည်။ နိုင်ငံခြားမှ ပြန်ရောက်လာသော ဆရာတော်ဘုရားကြီး၏ အတွေးအမြင် အယူအဆတို့သည် အံ့သြဖွယ် ပြောင်းလဲတော်မူခဲ့ပါသည်။ ကျောင်းတိုက်သို့ ပြန်ရောက်လာပြီး မကြာမီ ချက်ချင်းဆိုသလို သံဃာအားလုံးကို စည်းဝေး၍ အောက်ပါအတိုင်း သြ၀ါဒ ပေးတော်မူခဲ့ပါသည်။

“အရှင်ဘုရားတို့ တပည့်တော် စကားပြောတတ်ပါတယ်။ဒါပေမဲ့ နိုင်ငံခြားရောက်တော့ အ အ ဘ၀ရောက်ခဲ့ရတယ်။ တပည့်တော် မျက်စိကောင်းပါတယ်။ဒါပေမဲ့ နိုင်ငံခြားရောက်တော့ အကန်းဘ၀ ရောက်ခဲ့ရတယ်။ တပည့်တော် နားကောင်းပါတယ်။ ဒါပေမဲ့ နိုင်ငံခြားရောက်တော့ အထိုင်းဘ၀ ရောက်ခဲ့ရတယ်။တပည့်တော် အတွက်တော့ အရွယ်လွန် နောက်ကျခဲ့ပါပြီဘုရား။ အရှင်ဘုရားတို့ တပည့်တော်လို မ အ ဘဲနဲ့ အ အ ဘ၀ အရောက်မခံကြပါနဲ့ဘုရား။မကန်းဘဲနဲ့ အကန်းဘ၀ အရောက်မခံကြပါနဲ့ဘုရား။နားကြားပါလျက် အထိုင်းဘ၀ အရောက်မခံကြပါနဲ့ဘုရား။အင်္ဂလိပ်စာကို အချိန်ရှိတုန်း လေ့လာသင်ကြားကြပါဘုရား’’ဟု သြ၀ါဒ ပေးတော်မူခဲ့ပါသည်။ထို့မျှသာမက ဆရာတော် ဘုရားကြီးသည် ပညာရေးမှူးတစ်ယောက်ကို ခေါ်၍ စာချဘုန်းကြီးများအား အင်္ဂလိပ်စာ သင်ကြားစေ၍ စာသင်သားများအားလည်း လာရောက်သင်ယူနိုင်ကြောင်း အမိန့်ရှိခဲ့ပါသည်။ ဆရာတော်ဘုရားကြီး၏ အတုယူဖွယ် ကြည်ညိုဖွယ် ကောင်းသော စိတ်ဓာတ်ကို လေးစား လိုက်နာသင့်ပါသည်။မိမိ၏ မှားယွင်းသော အယူအဆကို မှားသည်ဟု သိသည်နှင့်တစ်ပြိုင်နက် ၀န်ခံခြင်း၊ ပြုပြင်နိုင်ခြင်းသည် ပညာရှိပီသပါပေသည်။ အရေးကြုံ ကိုယ်တွေ့မှ ယုံတတ်သော ပုဂ္ဂိုလ်များအတွက် သင်ခန်းစာ ယူဖွယ်လည်း ကောင်းလှပါသည်။ နောက်မှ ရသော ဆရာတော်ဘုရားကြီး၏ နောင်တသည် သူ့အတွက် အသုံးမ၀င်သော်လည်း တပည့်များအ တွက်တော့ ခိုင်မာသော သာဓကတစ်ခုအဖြစ် ဖော်ပြနိုင်ခဲ့ပေသည်။

စာရေးသူတို့ မြန်မာနိုင်ငံသည် ကမ္ဘာမှာ ထေရ၀ါဒဗုဒ္ဓသာသနာ အထွန်းကားဆုံးနိုင်ငံဖြစ်သည်။စာပေ ကျမ်းဂန် တတ်ကျွမ်းသော ဆရာတော်များ ၊ ပိဋကတ်သုံးပုံ အာဂုံဆောင်နိုင်သည့် သာသနာ့အာဇာနည် ဆရာတော်များ ပေါ်ထွန်းရာ ဘူမိနက်သန် နေရာမှန်အဖြစ် အထင်ရှားဆုံးသော နိုင်ငံလည်းဖြစ်သည်။ကမ္ဘာတစ် ၀ှမ်းက ပညာရှင်များက ထေရ၀ါဒဗုဒ္ဓသာသနာအကြောင်း စိတ်ဝင်စား၍ လာရောက်လေ့လာကြသည်။ထိုအခါ ပိဋကတ်စာပေသာ တတ်ကျွမ်းကြသော သာသနာ့ခေါင်းဆောင် ဆရာတော်များမှာ ကမ္ဘာသုံး အင်္ဂလိပ်စကားကို မပြောတတ်၍ အ အ နှင့်တူလေတော့၏။ အင်္ဂလိပ်စာသာ တတ်သော နိုင်ငံခြားသားနှင့် တခြားလူတို့မှာတော့ ပိဋကတ်စာပေ မတတ်သဖြင့် အကန်းနှင့် တူလေတော့၏။ နှစ်ဦးနှစ်ဖက် အကျိုးမထွက်သဖြင့် ၀မ်းနည်းစရာ ကောင်းသော ဖြစ်ရပ်ပင် ဖြစ်ပါတော့သည်။ ဘာသာရေးနှင့် ပတ်သက်၍ ဘာသာပြန်သူကို အားကိုးခြင်းသည် မှားယွင်းသော လမ်းစပင် ဖြစ်ပါသည်။ဘာသာပြန်တစ်ယောက်က နိုင်ငံခြားသားတစ်ယောက်အား ဘုရားရင်ပြင်တော်၌ ရှိသော တံခွန်တိုင်အကြောင်း ရှင်းပြနေသည်ကို စာရေးသူကိုယ်တိုင် ကြားခဲ့ဘူးပါသည်။ နိုင်ငံခြားသားက ဘာလဲလို့ မေးသောအခါ “Buddha’s pen” မြတ်စွာဘုရား၏ ဖောင်တိန်ဟု ဖြေလိုက် လေသည်။လမ်းညွှန်တစ်ယောက်၏ ဘာသာရေး ဗဟုသုတ မရှိမူကြောင့် အဓိပ္ပါယ်အယူအဆ လွဲမှားခဲ့ရသည်။ ဘာသာရေးနှင့် ပတ်သက်လျှင် ဘာသာရေးခေါင်းဆောင်များသာ အသိဆုံးဖြစ်ပါသည်။သို့သော် အများစုသည် မိမိသိထား တတ်ထားသော အသိပညာ အတတ်ပညာတတ်တို့ကို အင်္ဂလိပ်စာပေဖြင့် ရှင်းလင်း မပြနိုင်ပေ။ ထို့သို့ ဖြစ်ရသည်မှာ ________

အမြင်ကျဉ်းသူ တစ်ချို့က ကမ္ဘာ့သာသနာပြုဖို့ထက် မြန်မာသာသနာကိုပဲ ကောင်းကောင်း ပြုပါဦးဟု ဆိုကြသေး၏။ဤကဲ့သို့ အတွေးအခေါ် အယူအဆများ လွှမ်းမိုးနေသောကြောင့် မြန်မာနိုင်ငံ၌ ပိဋကတ် အကျော်အမော် များစွာရှိသော်လည်း ကမ္ဘာကို တင်ပြနိုင်ခွင့် မရှိသည်ကို သတိပြု သင့်ပေသည်။ အင်္ဂလိပ်စာသင်ကြားပို့ချခြင်း၊ အင်္ဂလိပ်စာပေ တတ်မြောက်ခြင်းသည် သာသနာ့ဝန်ထမ်း ရှင်ရဟန်းများအတွက် အပြစ်ကြီးတစ်ခု လွန်ကျူးနေမိသလို တစ်ချို့က ပြောကြပြန်သေးသည်။ မြတ်ဗုဒ္ဓက ကာမဂုဏ်အကြောင်းကို တကယ်သိတော်မူ သောအခါ ကာမဂုဏ်ရဲ့ ကောင်းကျိုးကို မတွေ့ရ ဆိုးကျိုး အပြစ်တွေကိုသာ မြင်တွေ့ရကြောင်း မိန့်တော်မူသကဲ့သို့ အင်္ဂလိပ်စာ ကျွမ်းကျင်သော ပညာရှင်တို့ကလည်း တကယ်တမ်းသာ အင်္ဂလိပ်စာတတ်ခြင်း၏ ဆိုးကျိုးအပြစ်တွေ ရှိမည်ဆိုလျှင် မသင်သင့်ကြောင်း၊ မတတ်သင့်ကြောင်း၊ မလေ့လာသင့်ကြောင်း ပြောကြမည်သာ ဖြစ်ပါ၏။ သို့သော်လည်း တစ်ဦးတစ်ယောက်မျှ အထက်ပါအတိုင်း ပြောခဲ့သည်ကား မတွေ့ဘူးပေ။

ကျွန်ုပ်တို့နိုင်ငံ၌ အင်္ဂလိပ်စာပေ တတ်ကျွမ်းသူ သာသနာ့ခေါင်ဆောင်များ အင်အားနည်းပါးလှပါ၏။ ပို၍ဆိုးသည်မှာ လေ့လာသင်ယူနေသူများကို အားပေးအားမြောက်ပြုရမည့်အစား ကဲ့ရဲ့ရူံ့ချ အပြစ်တင် ဝေဘန်ခြင်းပင် ဖြစ်ပါ၏။ထိုသူတို့၏ လက်သုံးစကားများမှာ “ အင်္ဂလိပ်စာ သင်ယူလျင် လောကီအလုပ်တဲ့။ လူထွက်တော့မယ်တဲ့’’ လူထွက်ခြင်း၊ မထွက်ခြင်း ဆိုသည်မှာ အင်္ဂလိပ်စာ တတ်ခြင်း မတတ်ခြင်းနဲ့ မသက်ဆိုင်ပေ။လက်ရှိ မျက်မှောက်ခေတ်၌ အင်္ဂလိပ်စာတတ် ဆရာတော်များ ကမ္ဘာမှာ ထင်ရှားပြီး အရေးပေးခြင်း ခံရသည်ကို မသိနားမလည်၍သာ ဆိုခြင်းဖြစ်ပေသည်။နောက်တစ်ခု ရှိသေး၏။ အင်္ဂလိပ်စာတတ်လျှင် ပါဠိစာပေဘက်၌ သဒ္ဓါတရား အားနည်းသွား၏ဟု ဆိုကြသေး၏။ မြန်မာအက္ခရာဖြင့် ရေးသားထားသော ပါဠိစာပေကိုသာ သိနားလည်ထားသူ၏ အမြင်သဘောထားပင် ဖြစ်ပါသည်။အမှန်တကယ် မှာ အင်္ဂလိပ်အက္ခရာဖြင့် ရေးသားထားသော ပါဠိစာပေ၊ တစ်ခြား အက္ခရာ အမျိုးမျိုးဖြင့် ရေးသားထားသော ပါဠိ စာပေများ ရှိသည်ကိုလည်း နားလည်ထားမည်ဆိုလျင် ထိုအမြင်မျိုး ရှိလိမ့်မည် မဟုတ်ပေ။ပို၍ ဆိုးသည့် စွပ်စွဲချက်မှာ အင်္ဂလိပ်စာပေကို သင်ယူခြင်း ချပို့ပေးသည် တိရိစ္ဆာန၀ိဇ္ဇာ(တိရစ္ဆာန်အတတ်ပညာ)သာ ဖြစ်သည်။ ဤသို့စွပ်စွဲ ပြောဆိုခြင်းသည် ပါဠိစာပေကို နှံ့စပ်အောင် မသိနားမလည်၍ ပြောဆိုခြင်း ဖြစ်ပေမည်။ သို့မဟုတ် နားလည်ပါလျက် ပြောဆိုသော သူသည် မိမိကိုယ်တိုင် အင်္ဂလိပ်စာ မသိမတတ်သဖြင့် ကဲ့ရဲ့ပြစ်တင်လို ခြင်းကြောင့် ကိုယ်လိုရာဆွဲယူ၍ ပြောဆိုခြင်း ဖြစ်ပေမည်။အမှန်တကယ် တိရိစ္ဆာန၀ိဇ္ဇာဆိုသည်မှာ ၀ိနည်းပါဠိတော်၌- တိရိစ္ဆာန၀ိဇ္ဇာနာမ ယံ ကိဥ္စိ ဗာဟိရကံ အနတ္ထသံဟိတံ။ သာသနာပ၌ ဖြစ်သော အကျိုးစီးပွားနှင့် မစပ်ယှဉ်သော အတတ်များကို ဆိုလိုပါသည်။၎င်းအတတ်တို့မှာ ကင်္ခါဝိတရဏီအဋ္ဌကထာ၌ ဟတ္ထိအဿရထဓနုထရုသိပ္ပအာထဗ္ဗဏခီလန၀သီကရဏသောသာပနမန္တာဂဒပ္ပယောဂါဒိဘေဒံ ပရူပဃာတ ကရံ။ ဆင်အတတ်၊ မြင်းအတတ်၊ ရထားအတတ်၊ လေးအတတ်၊ ဓားဆောက်ချွတ်အတတ်၊ အာထဗ္ဗနမန္တန်၊ ခိလနမန္တန်၊ ၀သီကရဏမန္တန်၊ သောသာပနမန္တန်၊ အဆိပ်ဆေးဖော်စပ်နည်း စသည် အပြားရှိသော သူတစ်ပါးကို ညှင်းဆဲနှိပ်စက်မူကို ပြုတတ်သော အတတ်ပညာများကိုသာ တိရစ္ဆာန၀ိဇ္ဇာခေါ်ကြောင်း ဖော်ပြထားသည်ကို ထောက်ဆခြင်းအားဖြင့် အင်္ဂလိပ်စာပေ သင်ကြားခြင်း ၊ လေ့လာခြင်းသည် တိရစ္ဆာန၀ိဇ္ဇာ မဟုတ်ကြောင်း လယ်ပြင်မှာ ဆင်သွားသကဲ့သို့ ထင်ရှားလှ ပေသည်။

ကမ္ဘာသုံး အင်္ဂလိပ်စာ မတတ်လျင် မြတ်ဗုဒ္ဓ၏ စစ်မှန်သော တရားတော်တွေကို ကမ္ဘာတစ်ဝှမ်းသို့ မည်သို့ ပြန့်ပွားအောင် ဆောင်ရွက်နိုင်မည်နည်း။ အင်္ဂလိပ်စာကို တကယ် တတ်ကျွမ်းပြီး ကမ္ဘာကို သာသနာ ပြန့်ပွားအောင် သာသနာ ပြုနေတော်မူကြသော ဆရာတော် သံဃာတော် အရှင်မြတ်တွေဟာ သဒ္ဓါတရား မရှိတော့ဘူးလို့ ယူဆကြမှာလား။ ပိဋကတ်စာပေတွေ တတ်ပြီး ကိုယ့်ရပ်ကွက်ကိုမှ သာသနာမပြုနိုင်သူကို သဒ္ဓါတရား ကောင်းသူလို့ သတ်မှတ်ကြမှာလား။ သဒ္ဓါတရား ကောင်း မကောင်းကို မည်သည့်ပေတံဖြင့် တိုင်းတာကြမလဲ။တစ်ယူသန် တစ်ဖက်သတ်ဆန္ဒဖြင့် ကိုယ်ကျိုးမဖက် အများအတွက် သာသနာပြု တော်မူကြသော ကမ္ဘာကျော် ဆရာတော်များကို မပြစ်မှားသင့်ပေ။ကျွန်ုပ်တို့ မြန်မာနိုင်ငံမှ အင်္ဂလိပ်စာပေ တကယ်တတ်ကျွမ်းပြီး သာသနာကို ကမ္ဘာက သိအောင် ဖော်ထုတ်တော်မူခဲ့ကြသော ဆရာတော် ဦးသေဋ္ဌိလာဘိဝံသ၊ဒေါက်တာ ဦးသီလာနန္ဒာဘိဝံသ၊သက်တော်ထင် ရှား ရှိတော်မူသော ပီနန်ကျွန်းဆရာတော် ဦးပညာဝံသ၊ သီတဂူဆရာတော် ဒေါက်တာ အရှင်ဉာဏိဿရ စသော ဆရာတော်ကြီးများကို ဂုဏ်ယူဘွယ် လေးစားဘွယ်အဖြစ် အားကျ အတုယူသင့်သည်။ ထေရ၀ါဒသံဃာ အများဆုံးဖြစ်သော ကျွန်ုပ်တို့ နိုင်ငံမှ ပြည်ပသာသနာပြုအဖြစ် ရှားရှား ပါးပါး သာသနာ့အာဇာနည်များပင် ဖြစ်ပါသည်။အမှန်အတိုင်း ၀န်ခံရမည် ဆိုလျင် ယနေ့ ကမ္ဘာမှာ ဗုဒ္ဓဘာသာဟု လူသိများလာသည်မှာ သီရိလင်္ကာနိုင်ငံမှ အင်္ဂလိပ်စာပေကို တကယ်တတ်ကျွမ်းတော်မူကြသော သာသနာပြုဆရာတော်များ ကျမ်းပြုအကျော် ဆရာတော်များ နှင့် မဟာယာနဗုဒ္ဓဘာသာ တိုင်းပြည်များမှ မဟာယာနဆရာတော်များ၏ ဖြန့်ဝေမူကြောင့်ဟု ဆိုလျင် မှားအံ့မထင်။

ထို့ကြောင့် အမြင်ကျယ်သော ဆရာတော်များသည် အင်္ဂလိပ်စာပေ၏ အရေးပါမူကို သိမြင်နားလည် တော်မူကြသည်။အင်္ဂလိပ်စာပေကို မိမိကိုယ်တိုင်လည်း လေ့လာသင်ယူ၏။တပည့်အဆက်ဆက်ကိုလည်း သင်စေ၏။ ကျွန်ုပ်တို့နိုင်ငံ၌ ပိဋကတ်စာပေ တတ်ကျွမ်းသော ဆရာတော်သံဃာတော်များ ပေါများလှပါ၏။သို့ သော် ကမ္ဘာသုံး အင်္ဂလိပ်စာပေ မရသောကြောင့် ကမ္ဘာအလယ်မှာ မျက်နှာငယ်ခဲ့ကြရသည်။စာမတတ် ပေမတတ်ဟု အထင်ခံခဲ့ကြရသည်။ထိုအကြောင်းကို ကောင်းကောင်းသိတော်မူသော မန္တလေးတိုင်း၊ပုသိမ်ကြီး မြို့နယ်၊ ရန်ကင်းတောင်ခြေ၊ ဥယျာဉ်ပရိယတ္တိစာသင်တိုက် ပဓာနနာယက ဆရာတော် ဦးဇောတိက (ဓမ္မာစရိယ MA SriLanka) သည် ခေတ်မီ စာသင်တိုက် တည်ထောင်တော်မူခဲ့ပါသည်။အတန်းတိုင်း အတန်းတိုင်း၌ အင်္ဂလိပ်ဘာသာ မသင်မနေရ တစ်ဘာသာအဖြစ် ပြဋ္ဌာန်း၍ သင်ကြားတော်မူခဲ့ပါသည်။ယခုဆိုလျှင် စာသင်တိုက်သက်တမ်း နှစ် (၂၀) ခရီးထိ အောင်မြင်စွာ ရောက်ရှိခဲ့ပါသည်။ပြည်တွင်းမှ ဘွဲ့ရတပည့်များ၊ ပြည်ပမှ ဘွဲ့ရတပည့်များ နှစ်စဉ် နှစ်တိုင်း မွေးထုတ်ပေးနိုင်ခဲ့သည်မှာ ၀မ်းမြောက် ဂုဏ်ယူဖွယ် ကောင်းလှပါသည်။ထို့ပြင် ဆရာတော်၏ အားပေး တိုက်တွန်းမူ ၊ကိုယ်တိုင်ချီးမြှင့်မူကြောင့် ရန်ကုန်မြို့ အင်းစိန်ရွာမပရိယတ္တိစာသင်တိုက်၊ နေပြည်တော် အောင်စည်သာပရိယတ္တိစာသင်တိုက်၊ မုံရွာမြို့ အုတ်ကန်တောရ ပရိယတ္တိစာသင်တိုက်၊ ရွှေဘိုမြို့ အောင်ဆုပန်ပရိယတ္တိစာသင်တိုက်၊ရန်ကင်းတောင် ရေငုံပရိယတ္တိစာသင်တိုက်၊ အတုလမဟာမြကျောက် ပရိယတ္တိစာသင်တိုက်တို့သည်လည်း ကမ္ဘာသုံး အင်္ဂလိပ်စာပေ မသင်မနေရ ဘာသာတစ်ရပ်အနေဖြင့် ပြဌာန်း သင်ကြားလျက် ရှိပေသည်။

အင်္ဂလိပ်စာ မတတ်သူများအတွက် ပြည်တွင်းမှာ နေလျှင် အခက်အခဲ မရှိလှပေ။သို့သော် အခွင့်သင့်၍ နိုင်ငံခြားခရီး ထွက်ခွာခွင့် ကြုံလာပါက လေယာဉ်ပေါ်တက်သည့်အချိန်မှ စ၍ အခက်အခဲ ဒုက္ခများနှင့် ရင်ဆိုင်ရမည်မှာ မြေကြီးလက်ခတ်မလွဲ သေချာလှပေသည်။ပြည်ပသို့ ပညာသင်ထွက်ခဲ့စဉ်က စာရေးသူအနေ ဖြင့် ပြောပလောက်သော အခက်အခဲ မရှိခဲ့ဘူးပေ။မိတ်ဆွေ သူငယ်ချင်းရဟန်းတော် တစ်ပါး၏ တွေ့ကြုံခဲ့ရ သော ဒုက္ခအခက်အခဲမှာတော့ ရယ်ချင်စရာပင် ကောင်းလှပါတော့သည်။ထိုပုဂ္ဂိုလ်ကား မြန်မာနိုင်ငံ၌ ဘွဲ့ပေါင်း မြောက်များစွာ ရရှိထားသော ပိဋကတ်အကျော်အမော် နာမည်ကြီး စာချဆရာတော် တစ်ပါးပင်ဖြစ်ပါသည်။ သူသည် ပိဋကတ်သုံးပုံကို နှံစပ်အောင် လေ့လာသင်ယူ တတ်မြောက်ထားသော်လည်း ကမ္ဘာသုံး အင်္ဂလိပ်စာ ပေ၌ အက္ခရာပင် ကွဲကွဲပြားပြား မသိရှာပေ။ ထို့ကြောင့်ပင် ထိုပုဂ္ဂိုလ်အတွက် လေယာဉ်ပေါ် တက်လာက တည်းက ဒုက္ခများနှင့် ရင်ဆိုင်ရတော့သည်။ လေယာဉ်ပေါ်ရှိ မိမိထိုင်သောခုံမှ ခလုတ်များကို တောင်နှိပ် မြောက်နှိပ် လုပ်ကြည့်မိသည်။ မီးစိမ်းပေါ်လာလိုက်၊ မီးနီပေါ်လာလိုက် ဖြစ်သွားပြီး နောက်ဆုံး လေယာဉ်မယ်ခေါ်သော ခလုတ်ကို နှိပ်မိလိုက်သဖြင့် လေယာဉ်မယ် ရောက်လာပါတော့သည်။ လေယာဉ်မယ်က စကားများ ပြောသွားသည်။ဘာပြောသည်ကို နားလည်းမလည် သိလည်း သူမသိလိုက်။ သတိထားမိသည်မှာ ချွေးတွေ ထွက်လာပြီး မျက်လုံးလေး အပြူးသားနဲ့ လေယာဉ်မယ်ကိုသာ ငေးစိုက် ကြည့်ခဲ့ရသည် ဆို၏။ သူ့ရဲ့ ဒုက္ခက ဤမျှနှင့် မဆုံးသေးပေ။ လေယာဉ်ပေါ်ရှိ ခရီးသည်အားလုံး ဖြည့်ပေးရသော White card စာရွက် ရောက်လာသည်။ သူကိုယ်တိုင်လည်း မဖြည့်တတ်။ သူများကိုလည်း အကူအညီ မတောင်းတတ်ဆိုတော့ ပါလာသော အိတ်ထဲ၌သာ ထိုးထည့်လိုက်မိသည်။ လေယာဉ်ပေါ်မှ ဆင်းပြီး immigration office (လူဝင်မူ ကြီးကြပ်ရေးရုံး ) က white card တောင်းသောအခါ အရှက်တကွဲ အကျိုးနည်း ခဲ့လေတော့သည်။ အင်္ဂလိပ်စာ မတတ်ဘဲ ပြည်ပထွက်လာသူ၏ ဒုက္ခအခက်အခဲများကား ပြောမဆုံးပေါင် တောသုံးတောင်ပင် ဖြစ်ပါတော့သည်။

မိတ်ဆွေ သူငယ်ချင်း၏ ထိုအဖြစ်အပျက်ကို တွေးမိလေတိုင်း သူ့အတွက်လည်း စိတ်မကောင်း ဖြစ်မိသည်။ ရှေးရိုးမှ ရှေးရိုးဟု ဆိုသော တစ်ယူသန် ၀ါဒစွဲ ဆရာသမားများကိုလည်း လျောက်ထား လိုက်ချင်ပါတော့သည်။ခေတ်ပေါ် ကား ၊ လေယာဉ်စသည်တို့ကို မစီးဘဲ ခြေလျင် (သို့မဟုတ်) နွားလှည်းသာ စီးသင့်ပါတော့သည်ဘုရားဟုပင် ဖြစ်ပါသည်။ စာရေးသူ၏ ဘ၀မှာတော့ ထိုကဲ့သို့သော အခက်အခဲမျိုး မကြုံခဲ့ရဘူးပေ။ အမြင်ကျယ်သော ဥယျာဉ်ပရိယတ္တိစာသင်တိုက် ဆရာတော်ဘုရားကြီး၏ ထံတော်မှောက်၌ ငယ်စဉ်တောင်ကျေး ကလေးဘ၀အရွယ်မှ စ၍ (၁၇) နှစ်တိုင်တိုင် ဆည်းကပ်သင်ယူ လေ့လာခဲ့သော ကျေးဇူးကြောင့်ပင် ဖြစ်ပေသည်။ဆရာတော်၏ တပည့်ဖြစ်ရသည်ကို “ အရတော်ပေစွ’’ ဟု အဖန်ဖန်တွေး၍ ၀မ်းမြောက်ဝမ်းသာ ဂုဏ်ယူကြည်နူးမိပါသည်။ကျွန်ုပ်တို့ မြန်မာပြည်၌ ထိုကဲ့သို့သော စာသင်တိုက်များ တိုးတက်လာဖို့ အချိန်တန်ပြီ ဖြစ်သည်။ ၀ါးလုံးခေါင်းထဲ၌ လသာနေသကဲ့သို့ ကျွန်ုပ်တို့ နိုင်ငံ၌ ပိဋကတ်အ ကျော်အမော် သာသနာ့အာဇာနည်ပုဂ္ဂိုလ် များစွာ ရှိသော်လည်း ကမ္ဘာသုံး အင်္ဂလိပ်စာပေ မတတ်ကျွမ်းမူ ကြောင့် ကျယ်ပြန့်စွာ သာသနာမပြုနိုင်ကြပေ။ ပုတ်ခတ်လိုခြင်း၊ အထင်သေးခြင်း၊ စော်ကားလိုခြင်းကြောင့် ဤသို့ တင်ပြ ပြောဆိုခြင်း မဟုတ်ပါ။ ကမ္ဘာမှာ ဘယ်ဘာသာနှင့်မျှ နိူင်းယှဉ်၍ မရအောင် သင့်လျော် မှန်ကန် ကောင်းမြတ်လှသော မြတ်ဗုဒ္ဓ၏ ဒေသနာတော်များကို ရေရှည်တည်တံ့စေနိုင်အောင်လည်းကောင်း၊ မြန်မာ့သာသနာ ကမ္ဘာက သိစေလိုသော ဆန္ဒဖြင့်လည်းကောင်း ရင်ထဲမှာ ရှိသော ခံစားချက်များကို တင်ပြခြင်းသာ ဖြစ်ပါ၏။

ကျွန်ုပ်တို့နိုင်ငံ၌ ပိဋကတ်စာပေများကို အချိန်အားဖြင့်လည်း၊ အရေအတွက်အားဖြင့်လည်းကောင်း၊ ကိုယ်အား ဥာဏ်အား ၀ီရိယအားဖြင့်လည်းကောင်း အများကြီး ပေးဆပ်၍ လေ့လာသင်ယူကြရသည်။သို့သော် လက်တွေ့ အသုံးချမူမှာ လုံးဝမရှိသလောက် နည်းပါးလှပေသည်။ ထို့ကြောင့်ပင် လုပ်ငန်းခွင် မ၀င်ဘူးသော ဘွဲ့ရ ပညာတတ် တစ်ယောက်ကဲ့သို့ နဖူးတွေ့ ဒူးတွေ့ ရင်ဆိုင်ရသောအခါ ယောင်တောင်တောင် ကြောင်တက်တက် ဖြစ်နေကြရသည်။ပြောင်းလဲသင့်သော ပညာရေးစနစ်ပင် ဖြစ်ပါသည်။သီရိလင်္ကာနိုင်ငံ၌ ပိဋကတ်စာပေများကို နည်းနည်းသင်ပြီး များများ အသုံးချနိုင်ကြသည်။ပါဠိစာပေဖြစ်စေ၊ အင်္ဂလိပ်စာပေဖြစ်စေ သာသနာဝန်ထမ်း ရဟန်းတော်များသာမက လူပုဂ္ဂိုလ်များပင် ရေးနိုင် ၊ဖတ်နိုင် ၊ ပြောနိုင်ကြသည်။ လက်ရှိအချိန်အခါ၌ ပိဋကတ်သုံးပုံ အာဂုံဆောင် ပုဂ္ဂိုလ်များ မရှိတော့ပေ။သို့သော် ပါဠိတော်နှင့် ပတ်သက်၍ ခွဲခြားပိုင်းဖြတ်သည့် နေရာမှာ အတုယူဖွယ် ကောင်းလှပါသည်။ကျွန်ုပ်တို့ မြန်မာကျောင်းသား ရဟန်းတော်များ သိထားခဲ့ပြီးသော အကြောင်းအရာ အချက်အလက်များကိုပင် စိတ်ဝင်စားဖွယ်ဖြစ်အောင် သင်ပြနိုင်စွမ်း ရှိသည်ကို လေ့လာတွေ့ရှိ ရပါသည်။တနည်းအားဖြင့် ဆိုရသော် မြန်မာနိုင်ငံ၌ အခြေခံအဆင့်မျှသာ ရှိသော ပိဋကတ်စာပေများကို အင်္ဂလိပ်စာပေဖြင့် ပြန်လည် သင်ပြပေးသောအခါ အင်္ဂလိပ်စာ အားနည်းသော ကျွန်ုပ်တို့ မြန်မာကျောင်းသား များအဖို့ အသစ်အဆန်းပင် ဖြစ်နေပါတော့သည်။ အလျင်းသင့်၍ တင်ပြချင်ပါသည်။နှစ်စဉ် နှစ်တိုင်း သီရိလင်္ကာ ရောက် မြန်မာကျောင်းသား ရဟန်းတော်များ၏ အရေအတွက်သည် တိုးတက် များပြားလျက် ရှိပါသည်။ဘာ ကြောင့် များပြားလာသနည်း ဟူသော မေးခွန်း၏ အဖြေကား မြန်မာနိုင်ငံ၏ ဘုန်းတော်ကြီး ပညာရေးစနစ်သည် တစ်လမ်းသွား ဖြစ်နေခြင်းကြောင့်ဟု လိုရင်းတိုရှင်း ဖြေနိုင် ပါသည်။သီရိလင်္ကာသို့ ပညာသင်ကြွလာရောက် သော ကျောင်းသား ရဟန်းတော်တစ်ပါး၏ ကုန်ကျစရိတ်မှာ အနည်းဆုံး မြန်မာကျပ် သိန်း(၃၀) ၀န်းကျင် ဖြစ်သည်။ ယခု ၂၀၀၉ခု ပညာသင်နှစ်အတွင်း မြန်မာကျောင်းသား ရဟန်းတော်များ၏ အရေအတွက်မှာ ၂၃၈ ပါး ဖြစ်သည်။ထို့ကြောင့် စုစုပေါင်း တစ်နှစ်စာ ကုန်ကျငွေ မြန်မာကျပ်အားဖြင့် အနည်းဆုံး သိန်းပေါင်း (၇၁၄၀)လောက် ဖြစ်သည်။မြန်မာဘဏ္ဍာရေးအတွက် စဉ်းစားသင့်သော အချက်အလက်ပင် ဖြစ်ပါသည်။ မြန်မာနိုင်ငံရှိ စာသင်တိုက် ခေါင်းဆောင် ဆရာတော်များက တညီတညွှတ်တည်း စာသင်သားတို့၏ ပညာရေးစနစ်ကို ပြောင်းလဲလိုက်မည် ဆိုပါက တစ်ခြားနိုင်ငံသို့ သွားရောက် သင်ကြားစရာ လိုတော့မည် မဟုတ်ပေ။အင်္ဂလိပ်စာပေကို အထင်ကြီး လေးစားလွန်း၍ သင်ယူလေ့လာခြင်းမျိုး မဟုတ်ဘဲ မသင်၍ မတတ်၍ မဖြစ်သောကြောင့် လေ့လာသင်ယူရခြင်း ဖြစ်သည်ကို နားလည်သင့်ပါသည်။

အချုပ်အားဖြင့် ဆိုရသော် ကမ္ဘာလူဦးရေနှင့် နိုင်ငံများသည် နေ့စဉ်နှင့်အမျှ တိုးတက်များပြားလာပါ သည်။လူဦးရေ တိုးတက်လာသည်နှင့်အမျှ နည်းပညာ ၊အသိပညာ၊ အတတ်ပညာတို့သည်လည်း တစ်ဟုန်းထိုး မြင့်တက်နေပေသည်။မည်သို့ဆိုစေ မြန်မာဆိုသည်မှာ ကမ္ဘာလူဦးရေနှင့် နိူင်းယှဉ်ကြည့်ပါက အလွန်သေးငယ် သော အစိတ်အပိုင်းမျှသာ ဖြစ်ပါ၏။သို့သော် ဗုဒ္ဓဘာသာ ရူထောင့်မှ ကြည့်ပါက ထေရ၀ါဒဗုဒ္ဓဘာသာ (၅) နိုင်ငံ တွင် ပရိယတ်အားဖြင့်လည်းကောင်း၊ ပဋိပတ်အားဖြင့်လည်းကောင်း၊ သံဃာအရေအတွက်အားဖြင့်လည်း ကောင်း၊ ဒါယကာ ဒါယိကာမတို့၏ သဒ္ဓါတရားအားဖြင့်လည်းကောင်း အသာဆုံး ၊အမြင့်ဆုံး အဆင့်တွင် ရပ်တည်လျက် ရှိပါသည်။ထို့ကဲ့သို့ အဆင့်အတန်း ရှိပါလျက် ကမ္ဘာမှာ မြန်မာသာသနာကို လူသိနည်းရခြင်း သည် တစ်ခုတည်းသော အားနည်းချက်ကြောင့် ဖြစ်ပါ၏။ထိုအားနည်းချက်မှာ မိမိသိထား၊တတ်ထား၊ သင်ယူလေ့လာထားသော ပညာရပ်များကို သူတစ်ပါးအား ပြန်လည်၍ ရှင်းမပြနိုင်သောကြောင့် ဖြစ်ပါသည်။ ကမ္ဘာသူ ကမ္ဘာသားတို့အား ရှင်းပြနိုင်ဖို့ရန်အတွက် အခြေခံလိုအပ်ချက်သည် ကမ္ဘာသုံး အင်္ဂလိပ်စကား ကျွမ်းကျင် တတ်မြောက်ဖို့ပင် မဟုတ်ပါလော။ ထို့ကြောင့် သာသနာခေါင်းဆောင် ၊စာသင်တိုက်ခေါင်းဆောင် ဆရာတော်များ အနေဖြင့် “ငါတို့မှ မသိခဲ့တာ တပည့်တို့လည်း သိစရာ မလိုဘူး” ဆိုသော အမြင်သဘောထား မျိုး မရှိကြဘဲ “ ငါတို့ညံ့ခဲ့ပေမဲ့ တပည့်စဉ်ဆက် မညံ့စေရ၊ ငါတို့ မသိခဲ့ မတတ်ခဲ့ပေမဲ့ တပည့်စဉ်ဆက် တတ်စေ ရမည် မညံ့စေရ” ဟူသော အမြင်ကျယ်သော သဘောထားကြီးသော စိတ်ထားမျိုးဖြင့် မြန်မာသာသနာ တနည်း အားဖြင့် ထေရ၀ါဒဗုဒ္ဓသာသနာ ကမ္ဘာကို လွှမ်းစေဖို့ ခေတ်သစ် ပညာရေး စနစ်သို့ တညီတညွတ်တည်း ပြောင်းလဲ ချီတက်ကြပါစို့ဟု တိုက်တွန်းလိုက်ရပါတော့သည်။

ဦးဉာဏိန္ဒ

ခေတ္တ - ကိုလံဘိုမြို့

သီရိလင်္ကာနိုင်ငံ